بیچەککردن پەکەکە.. مەوقەیگ میژوویە لە رووژ پەنجشەممەو لە هەرێم کوردستان دەسوەپی کەێد

شەفەق نيوز - هەڵگەردان تایبەت 

راپۆرتیگ تورکی، ریڕەوی بیچەککردن پەکەکە دیاری کرد کە ئەوەسا لە شار سلێمانی لە هەرێم کوردستان لە رووژ پەنجشەممەی ئایندە دەسوەپی کەێد، لە رسوومەیلیگ هیمایی کە ئەوەسا ئیبراهیم کالین سەرۆک هەواڵگری تورکیا سەرپەرشتیی کەێد، و سەرۆک رەجەب تەییب ئەردۆگان لە دویرەو کەفێدە شوینی، ئەو کارە کە تەکبیرە لە وەهار ئایندە تەواو بوود.

راپۆرتیگ لەلایەن رووژنامەی  "توركيا ئمڕوو"، کە ئاژانس شەفەق نیوز هەڵگەردانی کرد وت: ویرانکردن چەک لە ماوەی چەن رووژیگ دەسوەپی کەێد، و بڕیگ هیمایی لە ئەندامەیل پەکەکە جیوەجیی کەن، لەناو رسوومەیل  10 و12ی تەممووز، ئەوەیش لە چوارچیوەی بانگەوازی "توركيا چووڵە لە تیرۆر". 

دویای ئەوە کە راپۆرتەگە باس بەیاننامەی عەبدوڵلا ئۆجەلان ریبەر پەکەکە لە 27 شوبات گوزەشتە کرد، و کۆنگرەی حزبەگە کە لەناوی بڕیار پویچەڵکردن خوەی و داناین چەک دا، وت؛ چەوەڕی کریەێد ئەندامەیل حزبەگە سیمایەیل فڕەداین چەک لەو ئاهەنگە پیشکەش بکەن لەناوەین 10 و12ی تەممووز.

راپۆرتەگە وتیش: هەواڵگری تورکیا وە سەرپەرشتیاریی کالین، ئەوەسا چەودیاریکردن چەکداناین وەتەواوی کەێد، و ئاگادار سەرۆک ئەردۆگان کەێد.

  راپۆرتەگە لە زوان سەرچەوەیل ئەمنی وتیش: کالین لەی دویاییە سەردان هكاری و قەزایەیل يوكسيكوفا وتشوكورجا کرد، کە  وەگەرد عەلی جلیک پارێزگار هكاری نیشتر و وەگەرد ژەنەڕاڵ ليفنت ئەرغون فەرماندەی سوپای دوو، و وەرپرسەیل سەربازی و مەدەنی، کە باس ئاسایش سنوور وەرد عراق و ئیران و سوریا کرد.

راپۆرتە تورکیەگە وتیش: ودەسدان چەک وە هەماهەنگی ناوەین لایەنەیلیگ لە تورکیا و عراق و حکومەت هەرێم کوردستان وەڕیەو چوود.

 دیاری کرد کە وەدەسداین چەک توومار کریەێد و پەخش کریەێد وە سەرپەرشتی دەزگای هەواڵگری تورکیا، و مکیس نویەنەرەیل ریخریاگەیل کۆمەڵگای شارستانی و نویسەرەیل وتارەیل لەلایەن پارت گەلەیل و یەکسانی و دیموکراتی نزیک لە کورد کریاس ئەرا بەشداریکردن.

 وتیش: گشت ئەو چەکیلە توومار کریەن، و تورکیا ری نیەێد دووارە بچنە ناو جەبەخانەی دەوڵەتیگ ترەک، و تورکیا وەردەوام بوود لە جەنگ وەرانوەر ئەو ریخریاگەیلە کە لەی کارە چەک وەدەس نیەن.

وتیش: وەگەرد ئەوە، سەربازگەیل پەکەکە لە باکوور عراق زویوەزوی چووڵ کریەن، دیاری کرد کە ریکارەیل رەفتارکردن وەرد چزداین مەوقەی جیوەجیکردن ئی کارە جیوەجی کریانە، و چوارچیوەی کار دەسەیگ دیاری کریاس کە مەزەنە کریەێد لە پەرلەمان تورکیا دروس بوود.

   راپۆرتەگە وتیش: پارت گەلەیل و یەکسانی و دیموکراتی شاندیگ لە 20 نویسەر و تویتەر لە ریخریاگەیل ناحکومی و حزبەیل سیاسی ئەرا ناوچەگە تیەرێد ئەرا چەودیاریکردن ئەو گام میژوویە، دووپاتیش کرد کە میدیاکارەیل توەنن وە ئامرازەیل تاییەتیان لەناو ئەو رویداوە بوون، کە ئەوەیش وە سڵای حکومەت کریەێد.

لە کۆتایی، راپۆرتەگە قسەیگ لەلایەن ئەردۆگان هاورد هەناێ لە ئازەربایجانەو گلەو خوارد، کە وت: بڕیار پەکەکە وە داناین چەک دەسمیەتی لە زویکردن تەقەلایەیل (تورکیای بی تیرۆر) دەێد، وتیش: لاوردن چەک و خوین و ئەسر وە تەواوی لە ئەژیندای نەتەوەی ئیمەس، دەرەیل نوویگ ئەرامان واز کەێد، وتیش: ئەوسا چەوی کەفێدە شاندیگ لە پارت گەلەیل و یەکسانی و دیموکراتی ئەرا باسکردن لە گامەیل وەرەو جیوەجیکردن ئی ئامانجە.