دوو پارچە شیعر
ئیوارەس و لەناو پاییز دڵم هۊر چەوەیلد کەێ
نیەزانی ئی ئیوارانە چەنی شیوەی چەوەیلد دەی
لەناو ئی خاک خاپوورە خوو توورەێ تو چەپاوەم کرد
مە خوەم زانم کە ئی خاکە لە هۊرم ئەو چەوەیلد برد
ئەزیزم دڵ تەنگە هەر شەو چەوم لەیرە نیەچوودە خەو
وەهەر لایا کە چەو گل دام خودا ڕوو لە چەوەیلد وەێ
خودا هاوار ت خوەد دۊنی کەسی شووند نیەزانیدن
وەئیجارە ت چێشی بۊش م ئەو شوون چەوەیلد خەێ
دەم ئیواران منو پاییز کەفیمە ئی خێاوانە
دووارە وەفرێ وارێدن کە گوورانی چەوەیلد دەێ
ئێوارەسەو لە ناو پاییز دڵم هۊر چەوەیلد کەێ
عەلی ئولفەتی
زڵەێ گەرمەشین دەنگ خسەو ماڵان
تەرک تازە ڕەوز هات وە خێیاڵان
چەوان ڕفتانخێز چۊ تیەو وەهار
وەهار لە کیس دایم بۊمن ئازیەتبار
سڕناێ خەم ژەنێ سمکوو سەواران
لە سووز ناڵەێ دووژ دەواران
گووناێ هەوری پاش چکیەێدن لە خۊن
کزێ جەرگێیە قوڵ خوەێ لە دەرۊن
تۊلە دۊیەتڵەێ چەو کەژاڵ ڕەنگین
ئاخین وە دەردە و بەرگێ لە نەفتین
بەور وابردێ چەپەێ واێ زەلان
قڵ دامریاێ داێە وە چۊچان
داڵگەێ ڕوو دووس کڵافە گیسێ
نازگ نەمامێ چێیە لە کیسێ
ئاوا بۊ لە چەو چۊ هسارەێ سوو
ڕاز لە دەم بەساس گوڵخومچەێ خوەشبوو
خومچەگوڵەیل پڕ ڕاز و غورور
گوڵەیل بەیان وێژیەن تاکلوور
هەرجا کووپەێ گوڵ بوو خوەش دەورێ
گوڵێ رەوز کردگە لە سەر قەورێ
فەرهاد مەهدی نژاد
